Kirchenslavica: [Dobrotoljubie] Dobrotoljubie ili slovesa i glavizny svjaščennago trezvěnija, sobrannyja ot pisanij svjatych i bogoduchnovennych otec

The database of Church Slavonic (old) prints of the SBB-PK offers an overview of the prints and the approximately 1000 pages obtained and proofread with Transkribus in "Ground Truth" quality. The full text search in the text corpus of the GT data can be carried out via this widget.

Page-Nr	Page-Content [5]
28	Вели́кїй ѻ҆ц҃ъ на́шъ А҆нтѡ́нїй, верхо́вный ли́ка подви́жникѡвъ, процвѣта́ше въ пꙋсты́ни в̾ ца́рствованїе Кѡнстанті́на вели́кагѡ ѻ҆́колѡ тре́хъ со́тъ тридесѧ́тагѡ лѣ́та ѿ ржⷭ҇тва̀ Бг҃а ( Сло́ва ): совреме́ненъ же бы́лъ вели́комꙋ А҆ѳана́сїю, ѡ҆писа́вшемꙋ простра́ннѡ и҆ житїѐ є҆гѡ̀. На ве́рхъ же добродѣ́тели и҆ безстра́стїѧ дости́гши, а҆́ще и҆ простолюди́нъ и҆ некни́женъ, ѹ҆чи́телѧ свы́ше и҆мѣ́ѧше, вразꙋмлѧ́ющꙋю ры́бари и҆ млⷣицы, премꙋ́дрость Дх҃а: ѿ неѧ́же и҆ ѹ҆мо́мъ просвѣща́ѧсѧ, мно́гїѧ и҆ дрꙋгі́ѧ сщ҃е́нныѧ и҆ дх҃о́вныѧ ѹ҆чє́нїѧ, разли́чнымъ веща́мъ подоба́ющыѧ и҆здадѐ, и҆ премⷣрыѧ ѿвѣ́ты, къ вопроша́ющымъ, и҆спо́лненныѧ дш҃евныѧ по́льзы: ꙗ҆́коже во мно́гихъ мѣста́хъ н҆з̾ ста́рческихъ писа́нїй ѹ҆сма́триваетсѧ. Кромѣ̀ си́хъ и҆ содержа́щыѧсѧ в̾ настоѧ́щей кни́гѣ сто̀ се́дмьдесѧтъ гла́въ, се́й препросла́вленный ѻ҆ц҃ъ на́мъ ѡ҆ста́вилъ. А҆ что̀ ѻ҆́ныѧ сꙋ́ть и҆́стинное порожде́нїе Бг҃овн́днагѡ ѹ҆ма̀ є҆гѡ̀: то̀ све́рхъ про́чихъ, и҆ прпⷣбномꙋ́ченикъ Пе́тръ Дамаски́нъ ѹ҆твержда́етъ. Да и҆ са́мый сло́гъ рѣ́чи ѿе́млетъ всѧ́кїй слꙋ́чай сомнѣ́нїѧ, и҆ є҆два̀ гла́са не и҆здае́тъ тща́тельнѡ чтꙋ́щымъ, ꙗ҆́кѡ ѻ҆́ныѧ совреме́нны сꙋть дре́вности ѻ҆́ной сщ҃е́нной. Не ди́вно ѹ҆̀бо, а҆́ще ( ѻ҆́нъ) къ простѣ́йшей бесѣ́дѣ, и҆ древнеѻбра́зной, и҆ небрего́мой сло́гъ рѣ́чи склони́лъ: но то̀ ди́вно, ꙗ҆́кѡ ѿ толи́кїѧ простоты̀ толи́кое сп҃се́нїе, и҆ по́льза чтꙋ́щымъ быва́етъ. Коли́кое бо в̾ ѻ҆́ныхъ ѡ҆брѣта́етсѧ ѹ҆вѣре́нїе! коли́каѧ ѿ ѻ҆́ныхъ и҆стека́етъ сла́дость! и҆ во ѻ҆бщѐ, коли́кѡ и҆сточа́етсѧ бл҃гі́й нра́въ, и҆ соверше́нство є҆ѵⷢ҇лскагѡ жи́тельства! ѹ҆вѣдѧтъ коне́чнѡ сла́дость сїю̀, и҆мꙋ́щїи вкꙋси́ти ме́да сегѡ̀ мы́сленною горта́нїю ѹ҆ма̀. и҆́же \| [JPG]
29	И҆́ЖЕ ВО Ст҃Ы́ХЪ Ѻ҆ц҃А̀ НА́ШЕГО А҆НТѠ́НЇА ВЕЛИ́КАГѠ Ѹ҆ВѢЩА́НЇѦ ѡ҆ нра́вахъ человѣ́чекихъ и҆ благо́мъ житїѝ, во р҃о глава́хъ (состоѧ́щыѧ.) А҃. Лю́ди слове́сными ѕлоꙋпотреби́тельнѣ гл҃ютсѧ. Не сꙋ́тъ же слове́снїи, и҆зꙋчи́вшїисѧ наꙋ́камъ, и҆ кни́гамъ дре́внихъ мꙋдрецѡ́въ, но слове́снꙋю и҆мꙋ́щїи дш҃ꙋ, и҆ могꙋ́щїи разсꙋжда́ти, что̀ є҆́сть добро̀, и҆ что̀ є҆́сть ѕло̀, и҆ лꙋка́выхъ и҆ дꙋ́шевре́дныхъ ѹ҆бѣга́ющїи, благи̑мъ же и҆ дꙋшеполє́знымъ тща́тельнѡ поꙋча́ющїисѧ, и҆ сїѧ̑ творѧ́щїи со мно́гимъ благодаре́нїемъ Бг҃ꙋ. Сі́и є҆ди́ни слове́сными людьми во́истиннꙋ до́лженстьвꙋютъ нарица́тисѧ. В҃. И҆́стиннѡ слове́сный человѣ́къ, ѡ҆ є҆ди́номъ тщи́тсѧ, си́рѣчь, є҆́же повинова́тисѧ и҆ ѹ҆гожда́ти Бг҃ꙋ всѣ́хъ, и҆ семꙋ̀ то́чїю поꙋча́ти дꙋ́шꙋ свою̀, ꙗ҆́кѡ да благоꙋгоди́тъ Бг҃ꙋ, благодарѧ̀ за таковы́й и҆ толи́кїй про́мыслъ є҆гѡ̀, и҆ ѹ҆правле́нїе всѣ́хъ (тва́рей), во всѧ́комъ прнключе́нїи жите́йскомъ. Безмѣ́стнѡ бо врача́мъ благодари́ти ѡ҆ здра́вїи тѣ́ла, подаю́щымъ на́мъ и҆ го́рькїѧ и҆ неꙋго́дныѧ врачєвства̀: Бг҃ꙋ же ѡ҆ мни́мыхъ на́мъ ско́рбѧхъ не благодари́ти, и҆ не разꙋмѣ́ти, ꙗ҆́кѡ всѧ̑ достодо́лжно, и҆ въ по́льзꙋ на́мъ по про́мыслꙋ є҆гѡ̀ быва́ютъ: позна́нїе бо и҆ вѣ́ра въ Бг҃а, спасе́нїе и҆ соверше́нство є҆́сть дш҃ѝ. Г҃. Воздержа́нїе, неѕло́бїе, цѣломꙋ́дрїе, крѣ́пость, и҆ терпѣ́нїе, и҆ подѡ́бвыѧ чаⷭ҇ а҃ є҃і сⷪ҇ а҃ \| [JPG]
30	А҆́нтѡ́нїа вели́кагѡ и҆ подѡ́бныѧ си̑мъ вели́кїѧ и҆ добродѣ́тєльныѧ си̑лы полꙋчи́хомъ ѿ Бг҃а, противлѧ́ющыѧсѧ, и҆ противꙋстоѧ́щыѧ, и҆ вспомоществꙋ́ющыѧ въ приско́рбностѣхъ ѻ҆́ныхъ: каковы́ѧ си̑лы, а҆́ще ѡ҆бꙋча́емъ, и҆ готѡ́выѧ и҆мѣ́емъ, ничто̀ ѹ҆жѐ лю́тымъ, и҆ли болѣ́зненнымъ, и҆лѝ несно́снымъ мни́мъ намъ бы́ти, помышлѧ́юще, ꙗ҆́кѡ всѧ̑ сꙋ́ть человѣ́ческаѧ, и҆ побѣжда́ютсѧ ѿ добродѣ́телей, ꙗ҆̀же въ на́съ. Сегѡ̀ не мы́слѧтъ безꙋ́мнїи дꙋше́ю: не помышлѧ́ютъ бо, ꙗ҆́сѡ всѧ̑ до́брѣ, и҆ достодо́лжнѡ быва́ютъ въ по́лзꙋ на́шꙋ, да возсїѧ́ютъ добродѣ́тєли, и҆ ѹ҆вѣнча́емсѧ ѿ Бг҃а. Д҃. Стѧжа́нїе и҆мѣ́нїй и҆ бога́тое ѻ҆́ныхъ ѹ҆потребле́нїе, мечта́нїемъ є҆ди́нымъ маловре́меннымъ почита́ѧ, и҆ вѣ́даѧ, ꙗ҆́кѡ добродѣ́телное и҆ Бг҃оꙋго́дное житїѐ лꙋ́чше є҆́сть богатства: семꙋ̀ тве́рдѡ поꙋча́ѧсѧ, и҆ сїѐ въ па́мѧти содержѧ̀, не возстене́ши, не возрыда́еши, не ѹ҆кори́ши никогѡ́же, но ѡ҆ все́мъ бꙋ́деши благодари́ти Бг҃ꙋ, ви́дѧ хꙋ́ждшихъ себѧ̀ и҆ въ сло́вѣ, и҆ бога́тствѣ, ѹ҆твержда́ющихсѧ. Зла́ѧ бо стра́сть є҆́сть дш҃ѝ, по́хоть, и҆ сла́ва, и҆ невѣ́дѣнїе. Є҃. Слове́сный человѣ́къ самаго̀ себѧ̀ разсма́триваѧ, и҆скꙋша́етъ подоба̑ющаѧ, и҆ полє́знаѧ себѣ̀, и҆ что̀ со́бственно є҆́сть дꙋшѣ̀, и҆ поле́зно, и҆ что̀ чꙋ́ждо є҆ѧ̀. И҆ та́кѡ ѹ҆бѣга́етъ поврежда́ющихъ дш҃ꙋ, ꙗ҆́кѡ чꙋжды́хъ, и҆ ѿлꙋча́ющихъ є҆го̀ ѿ беземе́ртїѧ. Ѕ҃. Е҆ли́кѡ кто̀ ѹ҆мѣ́реннѣйшее и҆мѣ́етъ житїѐ, толи́кѡ є҆́сть благополꙋ́чнѣйшїй, ꙗ҆́кѡ не пече́тсѧ ѡ҆ мно́гомъ: ѡ҆ раба́хъ, земледѣ́льцахъ, и҆ стѧжа́нїи скотѡ́въ. Си̑мъ бо са́ми себѐ пригвожда́юще, и҆ ѿ си́хъ слꙋча́ющымсѧ го́рестѧмъ подпа́дающе, ѹ҆корѧ́емъ Бг҃а. Ѿ самопроизво́льныѧ же по́хоти на́шеѧ сме́рть ѹ҆си́ливаетсѧ, и҆ пребыва́емъ во тмѣ̀ житїѧ̀ грѣхо́внагѡ, прелща́еми, не познаю́ще сами́хъ себѐ. З҃. Не до́лженствꙋетъ кто́либо глаго́лати, ꙗ҆́кѡ не возмо́жно человѣ́кꙋ добродѣ́тельное житїѐ и҆мѣ́ти, но ꙗ҆́кѡ не ѹ҆до́бно: нижѐ просты̑мъ ѹ҆добопостижи́мо є҆́сть сїѐ. Добродѣ́телынагѡ же житїѧ̀ прїобща́ютсѧ, є҆ли́цы сꙋ́ть въ лю́дехъ благочести́вы, и҆ Бг҃олюби́вый и҆́мꙋтъ ѹ҆мъ: ѻ҆́бщїй бо ѹ҆́мъ є҆́сть мїрскїй, и҆ превра́тныи҆̀, помышлє́нїѧ подаю́щїй блага̑ѧ и҆ ѕла̑ѧ, премѣнѧ́ющїйсѧ є҆стество́мъ, и҆ въ вещество̀ и҆змѣнѧ́ющїйсѧ. Бг҃олюби́вый же ѹ҆́мъ мсти́тель є҆́сть ѕло́бы, самопроизво́льнѡ быва́ющїѧ въ лю́дехъ ѿ лѣ́ности. И҃. \| [JPG]
31	ѹ҆вѣща́нїѧ. И҃. Ненака́заннїи, и҆ невѣ́жды, смѣшны́мъ дѣ́ломъ почита́ютъ иаꙋ́ки, и҆ не жела́ютъ ѻ҆́нымъ внима́ти, поне́же ѡ҆блича́етсѧ и҆́хъ ненака́занность, и҆ жела́ютъ всѣ̑мъ, подо́бными себѣ̀ бы́ти: тѣ́мже ѻ҆́бразомъ и҆ невозде́ржнїи житїе́мъ, и҆ нра́вами, тща́тсѧ, да бꙋ́дꙋтъ всѣ̀ хꙋ́ждшими и҆́хъ, неви́нность себѣ̀ ѿ мно́жества ѕѡ́лъ сниска́ти мнѧ́ще. Погиба́етъ, и҆ смꙋща́етсѧ безси́лнаѧ дꙋша̀ ѿ ѕло́бы и҆мꙋ́щїѧ въ себѣ̀ блꙋ́дъ, го́рдость, ненасы́тимость, гнѣ́въ, проде́рзость, неи́стовство, ѹ҆бі́йство, во́пль, за́висть, лихои́мство, хище́нїе, трꙋ́дъ, ло́жь, сла́сть, лѣ́ность, печа́ль, стра́хъ, болѣ́знь, не́нависть, ѹ҆коре́нїе, безси́лїе, ле́сть, невѣ́дѣнїе, пре́лесть, заббе́нїе Бг҃а. Си́ми и҆ си̑мъ подо́бными мꙋ́читсѧ ѻ҆каѧ́ннаѧ дꙋша̀ ѿлꙋча́ющаѧ себѧ̀ ѿ Бг҃а. Ѳ҃. Добродѣ́тельное и҆ благочести́вое и҆ сла́вное житїѐ провожда́ти хотѧ́щїи, не по притво́рномꙋ нра́вꙋ, и҆лѝ ло́жномꙋ житїю̀ до́лжны сꙋди́тисѧ: но ꙗ҆́коже хꙋдо́жники, живопи́сцы, и҆ болванодѣ́ли, ѿ са́мыхъ дѣ́лъ показꙋ́ютъ ѻ҆нѝ добродѣ́телекое и҆ Бг҃олюбе́зное житїѐ, и҆ ꙗ҆́коже сѣ́тей, си́це всѣ́хъ лꙋка́выхъ сласте́й ѿвраща́ютсѧ. І҃. Бога́тый и҆ благоро́дный без̾ просвѣще́нїѧ дꙋше́внаго, н҆ всѧ́кїѧ добродѣ́тели жите́йскїѧ, мꙋ́дрствꙋющими до́брѣе позна́етсѧ ѕлоща́стенъ: ꙗ҆́коже ѹ҆бо́гїй, и҆ ѹ҆́частїю ра́бъ, ѹ҆че́нїемъ и҆ добродѣ́телнымъ житїе́мъ ѹ҆кра́шенный, благополꙋ́ченъ є҆́сть. Но ꙗ҆́коже стра́нники на пꙋте́хъ заблꙋжда́ютъ: си́це и҆ добродѣ́тельномꙋ житїю̀ не прилѣжа́щїи по́хотїю прелща́еми, погиба́ютъ. А҃І. Человѣкотво́рнымъ до́лженствꙋетъ глаго́латисѧ, ненака́занныхъ ѹ҆кроти́ти могꙋ́щїй, да возлю́бѧтъ наꙋ́ки и҆ ѹ҆че́нїе: тѣ́мже ѻ҆́бразомъ и҆ премѣнѧ́юшїи невозде́ржныхъ житїемъ къ добродѣ́тельномꙋ и҆ Бг҃оꙋго́дномꙋ житїю̀, человѣкотво́рными до́лженствꙋютъ глаго́латисѧ, ꙗ҆́кѡ человѣ́кѡвъ претворѧ́ющїи: кро́тость бо и҆ воздержа́нїе, благополꙋ́чїе є҆́сть, и҆ наде́жда блага́ѧ дꙋша́мъ человѣ́ческимъ. В҃І. Подоба́етъ лю́демъ, пои́стиннѣ, ира́вы и҆ житїѐ своѐ достодо́лжнѡ ѹ҆строѧ́ти. Семꙋ́ бо и҆спра́вившꙋсѧ, ѹ҆до́бь познае́тсѧ Бг҃ъ. Ѿ всегѡ̀ во се́рдца и҆ вѣ́ры, чтꙋ́шїй Бг҃а промышаѧ́емь быва́етъ ѿ негѡ̀, ѹ҆де́рживати ꙗ҆́рость, и҆ похоть: занѐ всѣ́хъ ѕѡ́лъ \| [JPG]
32	А҆нтѡ́нїа вели́кагѡ ѕѡ́лъ вина̀ є҆́сть по́хоть и҆ ꙗ҆́рость. Г҃І. Человѣ́къ глаго́летсѧ, и҆лѝ слове́сный, и҆лѝ и҆спра́витисѧ хотѧ́щїй. Неиспра́вленный бо не человѣ́комъ нарица́етсѧ: ꙗ҆́кѡ сїѐ не человѣ́ческое є҆́сть дѣ́ло, и҆ бѣ́гати подоба́етъ таковы́хъ. Живꙋ́щымъ во со ѕло́бою не лѣ́ть є҆́сть въ числѣ̀ беземе́ртныхъ быти когда́либо. Д҃І. Слове́сность на́мъ пои́стиннѣ соприсꙋ́тствꙋѧ досто́йными на́съ твори́тъ, да и҆менꙋ́емсѧ челобѣ́ки. Ѿмета́ющесѧ же слове́сности, є҆ди́нымъ расположе́нїемъ чле́нѡвъ и҆ гла́сомъ ѿ безслове́сныхъ ра́зиствꙋ́емъ. Да позна́етъ ѹ҆̀бо ѹ҆мный человѣ́къ себѐ самаго̀ безсеме́ртнымъ, и҆ да возненави́дитъ всѧ́кꙋю сра́мнꙋю по́хоть, вино́ю сме́рти выка́ющꙋю лю́демъ. Є҃І. Ꙗ҆́коже ко́еждо хꙋдо́жество подлежа́щыѧ себѣ̀ вещєства̀ ѹ҆краша́ѧ, добродѣ́тель свою̀ показꙋ́етъ, ꙗ҆́кѡ то древодѣ́латель, мѣ́дникъ, злата́рь, и҆ сре́бреникъ: та́кѡ и҆ мы̀ благо́е житїѐ и҆ добродѣ́тельное, и҆ Бг҃оꙋго́дное жи́тельствованїе слы́ша, до́лженствꙋемъ ꙗ҆влѧ́тисѧ, ꙗ҆́кѡ лю́ди вои́стиннꙋ слове́снїи є҆смы̀ дꙋше́ю, а҆ не и҆з̾ѻбраже́нїемъ тѣ́ла. Слове́снаѧ же пои́стиннѣ, и҆ Бг҃олюби́ваѧ дꙋша̀, а҆́бїе житє́йскаѧ всѧ̑ познае́тъ, и҆ Бг҃а ѹ҆милостивлѧ́етъ любе́знѣ, и҆ благодари́тъ є҆мꙋ̀ во и҆́стинѣ, къ немꙋ̀ и҆мѣ́ѧ стремле́нїе, и҆ мы́сль вею̀. Ѕ҃І. Ꙗ҆́коже ко́рмчїе къ цѣ́ли кора́бль ѹ҆правлѧ́ютъ, да не къ подво́дномꙋ, и҆лѝ ви́димомꙋ ка́мню приразѧ́тъ ѻ҆́ный: та́кѡ и҆ добродѣ́телыномꙋ житїю̀ ревнꙋ́ющїи прилѣ́жнѡ да ра́зсма́триваютъ, что̀ подоба́етъ и҆̀мъ твори́ти, и҆ чегѡ̀ ѹ҆бѣга́ти: и҆ и҆́стинныѧ и҆ Бж҃е́ственныѧ зако́ны да почита́ютъ поле́зными себѣ̀, лꙋка̑выѧ помышлє́нїѧ ѿ дꙋшѝ ѿсѣка́ѧ. З҃І. Ꙗ҆́коже ко́рмчїе и҆ ѹ҆здодержа́тели ѹ҆праждне́нїемъ и҆ прилѣжа́нїемъ, и҆справлѧ́ютъ то̀, ѡ҆ не́мже тщатсѧ: та́кѡ подоба́етъ и҆ къ пра́вомꙋ и҆ добродѣ́телвномꙋ житїю̀ прилѣжа́щымъ поꙋча́тисѧ и҆ пещи́сѧ, ꙗ҆́кѡ да достодо́лжнѡ и҆ Бг҃оꙋго́днѡ поживꙋ́тъ: хотѧ́щїй во и҆ помы́сливый, ꙗ҆́кѡ мо́жетъ, вѣ́рꙋѧ, къ безсме́ртїю прехо́дитъ. Н҃І. Свобо́дными да мнѧ́тсѧ тѝ, не по состоѧ́нїю свобо́дные, но житїе́мъ и҆ ира́вами свобо́дные. Не подоба́етъ бо нарица́ти свобо́дными. \| [JPG]

ID	1681162482
Title	[Dobrotoljubie] Dobrotoljubie ili slovesa i glavizny svjaščennago trezvěnija, sobrannyja ot pisanij svjatych i bogoduchnovennych otec
Jahr	Moskva - Moskovskaja Sinodalʹnaja Tipografija - 1793 - [1], 2, 6, 114, 126, 107, 229 Bl. 2°
Note	Nachdr. der Ausg. in Bucarest, 1990 erschienen; +/- Autopsie nach Exemplar der SBB Č. 1-4 Verantwortlichkeitsangaben aus der Bibliographie übernommen Zernova, A. Svodnyj katalog russkoj knigi, Nr. 1152 In kyrill. Schr., kirchenslaw.
Subjects	Dobrotoljubie
Cat-URL	https://stabikat.de/DB=1/XMLPRS=N/PPN?PPN=1681162482
URL	http://resolver.staatsbibliothek-berlin.de/SBB0002A52400000000
PURL	Citation link

Church Slavonic Old Prints

[Dobrotoljubie] Dobrotoljubie ili slovesa i glavizny svjaščennago trezvěnija, sobrannyja ot pisanij svjatych i bogoduchnovennych otec